ഉണ്ണികൃഷ്ണന്‍

നെറ്റിയില്‍ശോഭിയ്‌ക്കുംചന്ദനക്കുറിയിലാ
യിരമാദിത്യനുദിച്ചപോലെ,പിന്നെയാ
മിഴികള്‍ ചിമ്മിത്തുറക്കവേയേതോ താരം
കളിയായ് ചിരിച്ചപോലെ

കുഞ്ഞിക്കൈകാലുകള്‍ മൃദുവായ് തലോടു-
മ്പോളൊരുചെമ്പനീര്‍ തൊട്ടപോലെ
കടഞ്ഞെടുത്തൊരാ പൂമേനിയഴകും
പൌര്‍ണ്ണമിരാവായ് തീര്‍ന്നപോലെ

ഒതുക്കത്തിലുള്ളൊരാ കേശങ്ങള്‍ക്കിടയി-
ലൊളിമങ്ങാത്തൊരാ മയില്‍പ്പീലിയും
ആടയാഭരണങ്ങളലങ്കാരമാകുമാദ്യ-
മുദിച്ചൊരാ ചൈത്രനിലാവുപോലെ.

കയ്യിലെവെണ്ണയെമാറോടുചേര്‍ത്തുകൊണ്ടാ
രുമറിഞ്ഞീലയെന്നുകരുതിയോടിയൊളി-
യ്ക്കുന്ന ഉണ്ണിക്കണ്ണനെ നോക്കിച്ചിരിച്ചുവാ
വൃന്ദാവനത്തിലെ മാലോകരൊക്കെയും

അമ്മതന്‍ കോപമടക്കുവാനായി കൊഞ്ചി
ക്കുറുകിയെത്തിയാ മടിയില്‍ ചായവേ
ചേര്‍ത്തുപിടിച്ചുമ്മവെച്ചൂ യശോദ
കാര്‍വര്‍ണ്ണപുത്രനെ ലാളിയ്‌ക്കുവാനായ്

അംബരം നോക്കി ആശ്ചര്യം പൂണ്ടതും
വാനിലെ താരകം കണ്ണിറുക്കി,പുഞ്ചിരി
തൂകിയ ചെഞ്ചുളം ചുണ്ടില്‍ പാല്‍‌വെണ്ണ-
യലിയുന്നു അമൃതെന്നപോലെ

കള്ളച്ചിരിയോടെ ഗോപികമാരെയാ
വേണുനാദത്താല്‍ നടനമാടിച്ചതും
കാളിന്ദിതീരത്താടകളോരോന്നും പാടെയെടു-
ത്തതും കള്ളകൃഷ്ണന്റെ ലീലകളത്രേ

ഓടക്കുഴലതു അധരത്തില്‍ചേരവേ
വലം പാദമൊന്നു ചരിഞ്ഞുനിന്നു
ലാസ്യഭാവത്തിലടയുന്നു നയനം
മയങ്ങുന്നുവെല്ലാമാശബ്ദമാധുരിയില്‍

സമീരന്റെ താരാട്ടിലുറങ്ങുന്ന പൈതലെ
തിങ്കളും വെറുതെ നോക്കിനിന്നു
വര്‍‌ണ്ണിച്ചാല്‍ തീരില്ലയീ കുസൃതിയെ
അത്രമേല്‍ ഇഷ്ടമീ ഉണ്ണികൃഷ്ണനെ