ദേ ഇങ്ങോട്ട് നോക്ക്യേ

"അയ്യോ........

അന്നത്തെ കൌസല്ല്യാ സുപ്രഭാതം എന്റെ വക ആയിരുന്നു.

"എന്റെ ബുഷ് പോയേ......"

അലാറം ബഹുവചനമായതും കാന്തന്‍ ഓടിവന്നു. "സി എന്നന്നോ, എമ്മസ്സെന്നോ, എന്‍‌ഡീടീവിയോ?ഏതിലാ ന്യൂസ്. എന്താ സംഭവം?"

കണ്ടിന്യൂസായി വന്ന ചോദ്യങ്ങള്‍ക്കുത്തരമായി എന്റെ കൈ മുറ്റത്തേക്കു നീണ്ടു. "ഇത് വീവീസിയാ."
"അതെന്താടീ ഈ വീവീസീ"
"വെള്ളമൊഴിച്ചു വളര്‍ത്തിയ ചെടിയാ. ആ മൊട്ടസായിപ്പ് വന്ന് ക്രോപ് ചെയ്തോണ്ട്പോയി."

ബാല്‍ക്കണിയില്‍ താടിയ്ക്ക് കയ്യും കൊടുത്തുള്ള എന്റെ ഇരിപ്പ് ഒന്നുകൂടി മെഷര്‍ ചെയ്ത്തിരിഞ്ഞു നടക്കുന്നതിനിടയില്‍ കണവന്‍ പിറുപിറുക്കുന്നുണ്ടായിരുന്നു
“ഇങ്ങനെ നീ ഡൈലി അലറിയാല്‍ നമ്മളിവിടുന്ന് ക്രോപാവും”

ആ പറഞ്ഞത് രണ്ടാമത്തെ ചെവിയിലൂടെ പുറത്തേയ്ക്ക് വിട്ട് അന്നത്തെ കറക്കത്തിനുള്ള പ്ലാനിട്ടു. ശനീം ഞായറും വെറുതെ കളയാന്‍ പാടില്ല,ദൈവദോഷം കിട്ടും. വേഗം പണിയെല്ലാം തീര്‍ത്തു അന്ന് ചെയ്തു തീര്‍ക്കാനുള്ള കുരുത്തക്കേടിനുള്ള ആലോചന മുറുകിയതും നയനങ്ങളും വിടര്‍ത്തി കാന്തനെത്തി.

“കുടിക്കാനെടുക്ക്”കണ്ണിലുടക്കിയ പാചകക്കുറിപ്പില്‍ ചേര്‍ത്തിളക്കേണ്ട വരി വന്നപ്പഴാ ഒരു ചായ.
“മിക്സ് ചെയ്യണോ”
“എടീ, ചായയെടുക്കാന്‍ “
“ഓ അങ്ങനെ”

ചായ കയ്യീ കൊടുത്ത് സ്വല്പം മാറിയിരുന്നു.ചായ കുടിക്കുന്നത് കണ്ണുരുട്ടി നോക്കിയിരിക്കുന്നത് കണ്ടപ്പൊ കാന്തനൊരു സംശയം“നിന്റെ പഴേ സ്വഭാവം ഇപ്പഴും മാറീട്ടില്ലല്ലേ”
“എന്തു സ്വഭാവം?”
“വായ്നോട്ടം”
“ഹും” തൊണ്ണൂറ് ഡിഗ്രിയില്‍ മുഖം വെട്ടിത്തിരിച്ചിരുന്നു. പിന്നെ പതുക്കെ നൂറ്റീണ്‍പതിലേയ്ക്ക് വന്നു.

“ഇങ്ങനെ ഊതിക്കുടിക്കാന്‍ മാത്രം ചൂടുണ്ടോ ചായയ്ക്ക്?”
“ഇല്ലാതിരിക്കാന്‍ നീയിത് ഫ്രിഡ്ജിലല്ലല്ലോ ഉണ്ടാക്കീത്”
ഉറക്കം പോയതിന്റെ ചൂടാണതെന്നറിഞ്ഞതും ഞാന്‍ മെല്ലെ പിന്‍‌വലിഞ്ഞു

“കുറച്ചുനേരം മിണ്ടാതിരി, ഇത്തിരി പണീണ്ട്. അതൊന്ന് തീര്‍ക്കട്ടെ.”

തൃപ്തിയായി.

കല്ലു പെറുക്കാന്‍ അരി മുറത്തിലിട്ട് കൈകൊണ്ട് പരതണപോലെ ലാപ്ടോപ്പില്‍ ക്രിയ ആരംഭിച്ചതും കുറച്ചു പാട്ടു കേള്‍ക്കാമെന്ന മോഹം എന്നിലും ഉദിച്ചു. ശബ്ദം ഉണ്ടാക്കണ്ട എന്നു കരുതി ഹെഡ്ഫോണ്‍ തലേല്‍ കേറ്റി വെച്ചു. ഗസലിന്റെ ആസ്വാദനം എന്റെ മുഖത്തും വന്നു. തലയൊക്കെ ആട്ടി ആഹഹാ എന്നും പറഞ്ഞ് ഞാനങ്ങ് ലയിച്ചുപോയി. ഇടയ്ക്കിടെ കണവന്‍ എന്നെ നോക്കുന്നും ഉണ്ട്. ഇതെന്തിനാ എന്നെയിങ്ങനെ നോക്കുന്നത് എന്നാലോചിച്ച് കുറച്ചു നേരം ക്വസ്റ്റിന്‍ മാര്‍ക്കിനെ വിടാതെ പിടികൂടി.

അല്പം കഴിഞ്ഞതും കാന്തനെണീച്ച് അടുത്ത് വന്നു , “ നീ പാട്ടു കേക്കാ? “
“അല്ല, ഞാന്‍ പുട്ടുണ്ടാക്കാ” ഞാന്‍ വീണ്ടും നിഷ്കളങ്കയായി
“എടീ ഞാന്‍ പറഞ്ഞില്ലേ കുറച്ചുനേരം ശബ്ദം ഉണ്ടാക്കാതിരിക്കാന്‍? ഓഫീസ്സിലെ കുറച്ചുപണി തീര്‍ക്കാനുണ്ട്”
“അതിന് ഞാന്‍ മിണ്ടാതിരിക്കല്ലേ, ദേ തലേല് ഈ കുന്തം വെച്ചിട്ടും ഉണ്ട്.”

പറഞ്ഞുതീര്‍ന്നതും ആ മുഖത്ത് നവരസങ്ങള്‍ക്കുമതീതമായൊരു ഭാവം പൊട്ടിവന്നു. ഞാനും ജാഗകൂരയായി. എന്തും സംഭവിക്കാം. പക്ഷേ ഒന്നും മിണ്ടാതെ അങ്ങോര് ഹെഡ്ഫോണിന്റെ കോഡ് എന്റെ നേരെ നീട്ടി. അപ്പഴാ ഓര്‍ത്തത്, ഹെഡ്ഫോണ്‍ മാത്രെ ഫിറ്റായുള്ളൂ, കോഡിപ്പഴും ഔട് ഓഫ് പൊസിഷനാ...

ഒന്നും മിണ്ടാതെ ഒരു ഭാഗത്ത് മിണ്ടാതിരുന്ന് ഞാന്‍ ചമ്മി.
പതിവുപോലെ വായനയിലേയ്ക്ക് തിരിഞ്ഞു. കല്ല്യാണപ്പന്തലീ വെച്ചു കണ്ട പരിചയം പോലും കാണിക്കാതെയുള്ളെ ആ ഇരുപ്പ് കണ്ടപ്പൊ എനിക്ക് സഹിച്ചില്ല.
“ദേ ഇങ്ങോട്ട് നോക്ക്യേ , എനിക്കൊരു സംശയം”

“മോളിലുള്ള നക്ഷത്രം താഴേന്നുപോയതാണോ എന്നാവും”
“അത് ഞാന്‍ കഴിഞ്ഞ ആഴ്ച്ച ചോദിച്ചതല്ലേ”
“ഫയല്‍സ് കൂടുന്നതിനനുസരിച്ച് കമ്പ്യൂട്ടറിന്റെ വേയ്റ്റ് കൂടുമോ എന്നാവും”
“ഹ, അതൊക്കെ ഞാന്‍ ഒരുവട്ടം ചോദിച്ചതല്ലെ, ഇത് അതൊന്നുമല്ല”
“എന്നാ പറ, എന്താ”
“ഈ എല്‍‌റൂ എന്നുവെച്ചാലെന്താ?“

പാത്താം ക്ലാസ്സിലെ എക്സാമിന് ആശയം വ്യക്തമാക്കുക ചോദ്യം കണ്ടപ്പോ എന്റെ മുഖത്തുണ്ടായ അതേ ഭാവം ആ മുഖത്തും വന്നു.

“ചായ കുടിയ്ക്ക്, എന്നിട്ട് പറഞ്ഞാ മതി”“ഇനി എന്ത് കുടിക്കാനാ, ഒരാഴചയ്‌ക്കുള്ള വെള്ളം കുടിപ്പിച്ചില്ലേ. ഞാന്‍ വിക്കീലും ഗൂഗിളിലുമൊക്കെ ഒന്നു തപ്പട്ടെ”

അഫ്ഗാന്‍ ഗുഹകളില്‍ ലാദനിക്കായെ തപ്പാനിറങ്ങിയപോലെ സെര്‍ച്ചിങ് തുടങ്ങി.

“നീയാ സ്പെല്ലിങ് ഒന്നു പറഞ്ഞേ”
"e l r u e"
"ഇതുപോലെ ഇനീം ഉണ്ടോ വാക്കുകള്‍ . ഉണ്ടേല്‍ പറ ഒരാഴ്ച്ച ലീവെടുക്കാനാ.”
“ആദ്യം ഇത് കണ്ടുപിടിക്ക്, എന്നിട്ടാവാം ബാക്കി”

ഫിനിഷിങ് പോയന്റിലെത്തുന്ന സന്തോഷത്തോടെ ഞാനും സെര്‍ച്ചിങ് തുടങ്ങി.

“നീ ഇംഗ്ലീഷില്‍ പോസ്റ്റ് ഗ്രാജ്വേഷന്‍ എടുത്തതല്ലേ, പിന്നെന്താ മീനിങ് കിട്ടാന്‍ ഇത്ര ബുദ്ധിമുട്ട്?”
“യൂനിവേഴ്സിറ്റിക്കാര്‍ക്ക് അബദ്ധം പറ്റിയതിന് ഞാനെന്തു ചെയ്യാനാ”
“എല്‍‌റൂ എന്നതിന് ഒറ്റവാക്കൊന്നും ഇല്ല.“
“വേണ്ട, പാരഗ്രാഫാക്കി പറഞ്ഞാ മതി. പരദൂഷണം ആരേലും വണ്‍‌വേഡാക്ക്വോ“
“നിനക്ക് എന്നോടെന്തെങ്കിലും പൂര്‍‌വ്വവൈരാഗ്യം ഉണ്ടോ. ഉണ്ടെങ്കില്‍ നമുക്ക് പറഞ്ഞു തീര്‍ക്കാം”
“അറിയില്ലെങ്കീ പറഞ്ഞാ പോരേ”

കാന്തനും തോല്‍ക്കാനുള്ള മനസ്സില്ല. മൈക്രോസോഫ്റ്റുകാരുടെ വീടുവരെ തപ്പിക്കഴിഞ്ഞിട്ടും എല്‍‌റൂ കിട്ടിയില്ല.

ഒടുവില്‍ തെല്ലൊരു സംശയത്തോടെ പതുക്കെ ചോദിച്ചു- “നീയിത് എവിടാ കണ്ടെ?“
“ഓ,പിന്നേ.അത് പറയാഞ്ഞിട്ടാവും മീനിങ് കിട്ടാത്തെ"
അല്ലെടീ, ഒന്നറിയാനാ.“വിശ്വസിക്കാവുന്ന സ്ഥലത്താ കണ്ടത്.”

ഞാന്‍ പറയുമെന്ന വിശ്വാസത്തില്‍ കാന്തന്‍ എന്നേം നോക്കിയിരുന്നു.ഇനീപ്പൊ അതറിയാണ്ട് പ്രശ്നം വേണ്ട.
"ഞാനത് കണ്ടത് ഇവിടാ”എന്റെ ചൂണ്ടുവിരലിന്റെ അറ്റത്തേയ്ക്ക് നോക്കിയതും കാന്തന്റെ കയ്യീന്ന് മൌസ് സ്ലിപ്പായി. ചെരിച്ചും ബോള്‍ഡിലും എഴുതിയ വാക്കുകള്‍ , അതിന് താഴെ ഒരു ചതുരപ്പെട്ടിയും. മുകളില്‍ വൃത്തിയായി എഴുതിയിരിക്കുന്നു ‘വേഡ് വെരിഫിക്കേഷന്‍'

“ഇവിടെ കാണുന്ന വേഡിന്റെയൊന്നും അര്‍ഥം എനിക്ക് കിട്ടുന്നേ ഇല്ല.ഇംഗ്ലീഷ്കടലീ കായം കലക്കിയപോലുള്ള ഭാഷയാന്നറിയാം. ന്നാലും ഇങ്ങനേം ഉണ്ടോ...”അനാവശ്യമൊന്നും പറഞ്ഞില്ലെന്ന മട്ടില്‍ ഞാന്‍ അങ്ങനെത്തന്നെ ഇരുന്നു.

മറുപടിയായി ഒന്നും കേള്‍ക്കാതായപ്പോ വീണ്ടും ഞാനൊന്നു ജാഗകൂരയായി. അടികിട്ടുമോ അതോ മൊത്തത്തീ തരിച്ചിരിക്കുകയാവുമോ? അനക്കമൊന്നും ഇല്ല. അറ്റ്ലീസ്റ്റ് ഒരു നെടുവീര്‍പ്പെങ്കിലും...രണ്ടും കല്‍പ്പിച്ച് ഞാനൊന്നു തിരിഞ്ഞു നോക്കിയതും പ്രിയതമന്‍ തലകുമ്പിട്ടു, കൈകള്‍ കൂപ്പി.

“മാന്‍ ലിയാ മോളൂ മാന്‍ ലിയാ”

ഹൊ നമിച്ചിരിക്കുന്നു, അതും ഹിന്ദീല്.